बार्सिलोनाले उरुग्वेका स्ट्राइकर सुवारेजलाई टिममा भित्रायो
Admin / 2014-07-17 04:50:38
नेपाल ब्युरो–साउन १, एजेन्सी ।
स्पेनिस क्लब बार्सिलोनाले उरुग्वेका फुटबल खेलाडी लुइस सुवारेजलाई क्लबमा अनुबन्ध गरेको छ ।
बार्सिलोना फुटबल क्लबले पत्रकार सम्मेलनमार्फत सुवारेजलाई क्लबमा भित्राएको औपचारिक जानकारी दिएको हो ।
क्लबका खेलकुद निर्देशक एन्डोनी जुबिजारेटाले सुवारेज शतप्रतिशत बार्सिलोनाको सदस्य भएको घोषणा गरे । सुवारेजलाई क्लबले ७५ मिलियन पाउण्डमा इंग्लिस प्रिमियर क्लब लिभरपुलबाट खरिद गरेको बताइएको छ । लिभरपुलमा जानुअघि सुवारेज नेदरल्याण्ड्सको आयाक्स फुटबल क्लबबाट खेल्ने गर्दथे ।
२७ वर्षीय स्ट्राइकर सुवारेज क्लबमा अनुबन्ध भएपनि फिफाको प्रतिबन्धमा रहेको कारण पत्रकार सम्मेलनमा सार्वजनिक भने भएनन् । ब्राजिलमा सम्पन्न विश्वकप फुटबलमा इटालीविरुद्धको खेलमा विपक्षी खेलाडी जर्जियो केलिनीलाई टोकेपछि उनी हाल ४ महिने प्रतिबन्धमा रहेका छन । सुवारेजको आगमनले स्पेनिस क्लब बार्सिलोनाको आक्रामक फुटबलमा बल पुगेको छ ।
बार्सिलोनामा यसअघि नै ब्राजिलका स्ट्राइकर नेइमार र अर्जेन्टिनाका लियोनल मेसी जस्ता स्टार खेलाडीहरु रहेका छन् ।
उता इङिलस प्रिमियर लिगको महारथी लिभरपुलले सर्बियाका विङ्गर लाजर मार्काेभिचलाई पोर्चुगाली टोली बेन्प्किकाबाट भित्राएको जनाएको छ । मार्काेभिचसँग लामो सम्झौताका लागि क्लबले २ करोड पाउन्ड खर्चेको बेलायती सञ्चारमाध्यमले जनाए पनि आधिकारिक सरुवा रकम भने खुलाइएको छैन ।
आगामी सिजनका लागि लिभरपुलले अनुबन्धन गरेकामा मार्कोभिच चौथो खेलाडी हुन्। । यसअघि टोलीले रिक्की लाम्बर्ट, एडम लाल्ना र इमरे कानलाई अनुबन्ध गरिसकेको छ ।
प्रकाशित मिति: 2014-07-17 04:50:38
प्रतिक्रिया: